اسلام آباد۔28جولائی (اے پی پی):وزیراعظم عمران خان آکھیے جو پاکستان دہشتگردی دے خلاف جنگ اچ ساریں توں وݙی قربانی ݙتی اے اتے ایندے نال پاکستان دی معیشت کوں ناقابل تلافی ضیان پڄے ، دہشتگردی دے خلاف جنگ اچ 70 ہزار توں ودھ پاکستانیاں جان دی قربانی ݙتی اتے پاکستان دی معیشت کوں 150 ارب ڈالر توں ودھ دا ضیان تھئے ،امریکا تے نیٹو افواج دی شکست دا الزام پاکستان تے لاوݨ ناانصافی اے، امریکا افغان مسئلے دا حل کڈھݨ اچ ناکام رہیا ،کہیں وی ملک مذاکرات کیتے طالبان تے پاکستان توں ودھ دبائونی پاتا ، پاکستان دی معیشت مزید افغان مہاجرین دا ٻوجھ نی چا سڳدی ، پاکستان افغانستان اچ امن کیتے سہولت کاری کریندا پئے ،پاکستان افغانستان اچ کہیں جھیڑے دا حصہ نہ بݨسی ، اساں صرف امن دے شراکت دار ہیسے، جنسی تشدد کرݨ آلا فرد ہی ایں جرم دا واحد ذمہ وار ہوندے تے جنسی تشدد دا نشانہ بݨݨ آلا قصوروار نی ہوندا ۔امریکی نشریاتی ادارے ”پی بی ایس“کوں انٹرویو اچ وزیراعظم آکھیے جو امریکا تے نیٹو افواج دی شکست دا الزام پاکستان تے لاوݨ ناانصافی اے، افغانستان گزریل 40 سال توں حالت جنگ وچ ہے، پاکستان کئی واری افغان مہاجرین دی واپسی دی ڳال کیتی اے، پاکستان اتے افغانستان دے درمیان 1500 میل طویل سرحد اے، اے کݙاہیں باقاعدہ سرحد نہ ہئی ، ایں کوں ڈیورنڈ لائن آکھیا ویندے۔ انہاں آکھیے جو پاکستان تے افغانستان ݙوہیں پاسوں لوک آزادانہ نقل وحرکت کریندے ہن ، پاکستان پہلی واری ٻہوں رقم خرچ کرتے باڑ لاتی اے، ھک ویلھا ایجھا ہئی جو 50 مختلف مسلح گروپ پاکستان دی سکیورٹی فورسز تے حملے کریندے ہن ۔ وزیراعظم عمران خان آکھیے جو دہشتگردی دے خلاف جنگ اچ ساریں توں وݙا ضیان پاکستان دا تھے ، دہشتگردی دے خلاف جنگ اچ 70 ہزار توں ودھ پاکستانیاں جان دی قربانی ݙتی ، ایں جنگ توں پاکستان دی معیشت کوں 150 ارب ڈالر توں ودھ ضیان تھئے ، انہاں آکھیے جو امریکا کوں اݙے ݙیوݨ نال پاکستان ول دہشت گردی دا نشانہ بݨسی ، پاکستان امن اچ شراکت دار اے تے او جھیڑے دا حصہ نی بݨ سڳدا ، پاکستان دا موقف بالکل واضح اے، پاکستان افغانستان اچ امن کیتے سہولت کاری کریندا پئے۔ وزیراعظم آکھیے جو پاکستان امریکا تے طالبان کوں مذاکرات دی میز تے گھن آوݨ کیتے کردار ادا کتیے اساں وݙی اوکھی صورت حال توں نکلیوں ، دعاکریندوں جو افغانستان دے عوام اپݨے مستقبل دا فیصلہ خود کرن، ہݨ ادھ توں ودھ افغانستان طالبان دے کنٹرول وچ ہے ۔ وزیراعظم عمران خان آکھیے جو امریکا افغان مسئلہ دا فوجی حل گولیندا رہیا جیڑھا جو ممکن نہ ہئی چنانچہ امریکا افغان مسئلہ دا حل کڈھݨ اچ ناکام رہیا ، افغانستان دی تاریخ توں واقف ہاں، پہلے ہی آکھ ݙتا ہئی جو افغان مسئلے دا فوجی حل کائنی ، میکوں آپݨے ایں بیان تے امریکا مخالف اتے طالبان خان آکھیا ڳیا ۔ انہاں آکھیے جو بدقسمتی توں امریکا تے نیٹو افواج مذاکرات دی صلاحیت ونڄا ٻیٹھن ، جݙاں افغانستان اچ 1.5 لکھ فوج ہئی تاں سیاسی حل دی کوشش کیتی ونڄݨی چاہیدی ہئی ، ہݨ افغانستان اچ خانہ جنگی دا ݙر اے ، افغانستان اچ خانہ جنگی توں پاکستان وی متاثر تھیسی ، افغانستان اچ خانہ جنگی توں پاکستان کوں ݙوڑے مسئلیں دا سامݨا ہوسی ، پاکستان 30 لکھ توں ودھ افغان مہاجرین دی میزبانی کریندا پئے ، پاکستان اچ وی پشتون وݙی تعداد اچ آباد ہن ، ݙر اے جو خانہ جنگی توں مزید مہاجرین پاکستان دا رخ کریسن ، پاکستان دی معیشت مزید مہاجرین دا ٻوجھ نی چا سڳدی۔ ۔ پاکستان دی حکومت دہشت گردی دے خلاف جنگ اچ امریکا نال رلی تاں ملک اچ خود کش حملے تھئے ، نائن الیون حملیں اچ کوئی پاکستانی ملوث کائناں ہئی ، نائن الیون اتے نیویارک اچ تھیوݨ آلے واقعے توں پاکستان دا کوئی تعلق نہ ہئی ، وزیراعظم عمران خان آکھیے جو امریکا افغانستان توں انخلا دی تاریخ ݙتی تاں طالبان سمجھے جو او جت ڳئن ، ہݨ طالبان کوں سیاسی حل تے مجبور کرݨ اوکھا تھی ڳئے ،طالبان افغانستان اچ خود کوں فاتح تصور کریندن ، انہاں آکھیے جو افغان صدر اشرف غنی کوں انتخابات اچ دیر کرݨی چاہیدی ہئی ۔ وزیراعظم عمران خان آکھیے جو اسلام تریمتاں کوں عزت ݙیندے ، تریمتاں دے حوالے نال میݙے بیان کوں حقائق توں ہٹ تے بیان کیتا ڳیا ، میں پاکستانی معاشرے اچ جنسی جرائم ودھݨ تے ڳال کریندا پیا ہم ، میݙا مطلب معاشرے اچ برائی دی ترغیب کوں گھٹ کرݨا ہئی ، اسلام اچ پردہ صرف تریمتاں تئیں محدود کائنی، مرد کیتے وی پردے دا لحاظ کرݨ ضروری اے ، انہاں آکھیے جو جنسی تشدد کرݨ آلا فرد ہی ایں جرم دا واحد ذمہ وار ہوندے تے جنسی تشدد دا نشانہ بݨݨ آلا قصوروار نی ہوندا ۔
