بیجنگ۔4نومبر (اے پی پی) وزیراعظم محمد شہباز شریف آکھیا جو پاکستان کامیابیاں اتے ترقی دی سانجھے منزل کیتے، خطے اتے پوری دنیا اچ امن اتے ہم آہنگی ودھاوݨ کیتے چین نال رَل تے کم کریسی۔ ایندے اچ کوئی شک کائنی جو چین ٻعی ترقی کریسی اتے پاک چین دوستانہ تعلقات ٻئے ودھسن۔ اے ڳالھیں انہاں شنہوا کوں ہک انٹرویو ݙیندیں ہوئیں آکھی۔ انہاں آکھیا جو تساں کوں 1981 اچ سڑک تے شئیت ای کوئی کار نظردی ہووے، صرف بساں اتے سائیکلاں نظردی ہن اتے کئی سالیں اچ پورا ملک بدل ڳے اتے دنیا دے ݙوجھے دی ݙوجھی وݙی معیشت ٻݨ ڳے۔ اے آپݨی نوعیت دا ہک معجزہ اے۔ انہاں آکھیا جو اے چین دی کمیونسٹ پارٹی، اوندے رہنماواں دی بصیرت انگیز قیادت، انہاں دے وژن، قربانیاں اتے لگن پاروں اے۔ وزیراعظم آکھیا جو چین دی کمیونسٹ پارٹی دی 20 ویں نیشنل کانگریس پوری دنیا اچ ہک ٻہوں نشابر سنیھا ݙتے جو چین تسلسل، استحکام اتے پر امن کھڑے۔ مکمل غریبی مکاوں، روزگار دے بہتر موقع ݙیوݨ، تعلیم اتے صحت دی ݙیکھ بھال بہتر کرݨ اچ چین دی کامیابیاں کوں اجاگر کریندیں ہوئیں انہاں آکھیا جو شی جن پنک دا سی پی سی دی مرکزی کمیٹی دے جنرل سیکرٹری دے طور ولا منتخب تھیوݨ نہ صرف چینی عوام بلکہ دوست ملکاں کیتے وی اہم اے۔ انہاں آکھیا جو عالمی سطح تے اڄ صدر شی جن پنگ دی قیادت اچ چین ہک ایجھا ملک اے جئیں دے بغیر دنیا اڳوں نی ودھ سڳدی۔ اے کامیابیاں دا ہک عظیم احساس اے۔ انہاں واضح کیتا جو پاکستان چین توں سکھݨ دی کوشش کریندا پے۔ شہباز شریف چین پاکستان اقتصادی راہداری (سی پیک) کوں پاکستان دے بجلی، توانائی، انفراسٹرکچر اتے پبلک ٹرانسپورٹ دے شعبے اچ تبدیلی ڳھن آوݨ کیتے ہک گیم چینجر دے طور تعریف کیتی۔ وزیراعظم چین اچ شینزن سپیڈ دا حوالہ ݙیندیں ہوئیں آکھیا جو اساں اینکوں پاکستان سپیڈ آکھدوں اتے ایہو بھائی چارہ، تعاون اتے دوستی اے۔ انہاں امید کیتی جو سی پیک زراعت، جدید ٹیکنالوجی اتے آئی ٹی انڈسٹری کوں ودھاوݨ کیتے اگلے مرحضے اچ ویسی۔ شہباز شریف آکھیا جو او اقوام اتے معاشریاں وچال ہم آہنگی اتے امن کوں ودھاوݨ کیتے چین دے مجوزہ گلوبل ڈویلپمنٹ انیشیٹو اتے گلوبل سکیورٹی انیشیٹو دی حمایت کریندن۔
