اسلام آباد۔13اگست (اے پی پی):وفاقی وزیر اطلاعات و نشریات مریم اورنگزیب آکھیے جو قومی ترانہ ملک دی سنڄاݨ اے ، ری ریکارڈڈ قومی ترانے تے سیاست نی تھیوݨی چاہیدی ،اے اساں ساریں دا کریڈٹ اے ، نویں ری ریکارڈڈ قومی ترانے اچ پاکستان دے ثقافتی و علاقائی رنگاں دی عکاسی کیتی ڳئی اے ، لیاقت علی خان دے بعد شہباز شریف ݙوجھے وزیراعظم ہوسن جیڑھے جو کل پاکستان دے آفیشل ری ریکارڈڈ قومی ترانے دا اجراء کریسن ، ملک دے دفاع کیتے افواج پاکستان تے سیکورٹی فورسز ودھ ساریاں قربانیاں ݙتن، ملک اچ جݙاں وی جمہوری دور آئے، ایندے ثمرات پاکستان دے عوام کوں ملیے، ڈائمنڈ جوبلی دے موقع تے ھک سیاسی جماعت پاکستان دا جھنڈا ہٹا تے آپݨی جماعت دا جھنڈا لاتے اپݨی نکی ذہنیت دا ثبوت ݙتے ، یوم آزادی تے اساکوں نینگراں کوں اے سنھیا ݙیوݨا چاہیدے جو اساں ھک قوم ہیسے ، ساوے ہلالی پرچم تلے اساں ھک ہیسے ، اساکوں ملکی ترقی کیتے رل تے اڳوں ودھݨا اے ، ہفتے کوں اتھاں پریس کانفرنس توں خطاب کریندےہوئیں انہاں آکھیے جو وزیراعظم شہباز شریف اڄ (اتوار )قومی پرچم کشائی دی تقریب اچ نواں ری ریکارڈڈ قومی ترانہ لانچ کریسن ۔ انہاں آکھیے جو لیاقت علی خان 1954ء اچ پہلی واری قومی ترانے دا اجرا کیتا ہئی تے 68 سال بعد وزیراعظم پاکستان شہباز شریف جدید ٹیکنالوجی دے نال ری ریکارڈڈ قومی ترانے دا افتتاح کریسن۔ قومی ترانے دی تاریخ دا ذکر کریندے ہوئیں وفاقی وزیر آکھیے جو 1948ء اچ سردار عبدالرب نشتر دی سربراہی اچ حکومت قومی ترانے دی تیاری کیتے ھک کمیٹی بݨائی ہئی ۔ احمد غلام علی چھاگلہ دی تیار کیتی ڳئی دھن کوں اوں ویلھے دے وزیراعظم لیاقت علی خان اتے کمیٹی دے ارکان دے سامݨے پیش کیتا ڳیا ، 10 اگست 1950ء کوں سٹیئرنگ کمیٹی احمد چھاگلہ دی دھن تے قومی ترانے دی منظوری ݙتی۔ انہاں ݙسایا جو 1954ء اچ حفیظ جالندھری دی تحریر اچ ایں دھن کوں باضابطہ طور تے منظور کر تے قومی ترانہ نشر کیتا ڳیا ۔ وفاقی وزیر اطلاعات آکھیے جو لیاقت علی خان توں بعد وزیراعظم شہباز شریف ݙوجھے وزیراعظم ہوسن جیڑھے جو پاکستان دے آفیشل قومی ترانے دا اجراء کریسن ۔ انہاں ݙسائے جو قومی ترانے دی ری ریکارڈنگ دے سفر دا آغاز اساں 2017ء اچ کیتا ہئی ، اے کہیں قسم دا کریڈٹ کائنی ، اے پاکستان دا قومی ترانہ اے، ایندے وچ پاکستان دے گلوکاراں، مسلح افواج دے بینڈ ماسٹرز سودھے ٻئے لوکاں حصہ ڳھدے ۔ انہاں آکھیے پچھلی حکومت 8 جون 2021ء کوں جاوید جبار دی سربراہی اچ ھک سٹیئرنگ کمیٹی قائم کیتی ہئی جیں اچ نیشنل اکیڈمی آف آرٹس دے سربراہ ارشد محمود سودھے ٻئے ماہرین کوں رلایا ڳیا ہئی ، انہاں آکھیے نویں ری ریکارڈڈ قومی ترانہ ساریں صوبیں توں تعلق رکھݨ آلے 155 گلوکاراں ڳائے، 48 موسیقاراں تے6 بینڈ ماسٹرز ایندے اچ حصہ ڳھدے ۔ وفاقی وزیر اطلاعات ݙسائے جو قومی ترانے اچ پاکستان دی ثقافت، اقلیتاں سودھے ثقافتی و علاقائی رنگاں دی عکاسی کیتی ڳئی اے ، انہاں اسٹیئرنگ کمیٹی کوں مبارخ ݙیندے ہوئیں آکھیے جو اسٹیئرنگ کمیٹی دیاں کوششاں توں قومی ترانے دی 14 اگست 2022ء کوں لانچ ممکن تھئی ۔ انہاں آکھیے ساݙی خواہش ہئی جو قوم کوں 75 ویں سالگرہ تے ری ریکارڈڈ قومی ترانے دا تحفہ ݙتا ونڄے ۔ انہاں آکھیے جو آئی ایس پی آر دی شراکت توں وزارت اطلاعات مسلح افواج دے بینڈز کوں استعمال کر تے قومی ترانے دی ری ریکارڈنگ کیتی۔ انہاں قومی ترانے دی تیاری اچ تعاون تے ڈی جی آئی ایس پی آر دا وی شکریہ ادا کیتے۔ انہاں آکھیے اے ساریں کیتے باعث فخر اے، ہر او بندہ مبارخ باد دا مستحق اے جیں قومی ترانے دی تیاری کوں ممکن بݨائے جیں دی وجہ توں اساں 68 سال بعد 14 اگست کوں ری ریکارڈڈ قومی ترانہ پیش کرسڳسوں ۔ مریم اورنگزیب آکھیے جو قومی ترانے اچ اتحاد، اخوت اتے علاقائی شناخت کوں پورے پاکستان توں پیش کیتا ڳئے ، اڄ(اتوار) ھک تاریخی موقع اے، ایں تے اساں سارے خوش ہیسے ، انہاں ݙسائے جو ری ریکارڈڈ قومی ترانے دے حوالے نال سوشل میڈیا تے وی مہم چلائی ڳئی جیں تے عوام خوش تھئی اے ۔ انہاں آکھیے میں کیتے باعث فخر موقع اے جو اللہ تعالیٰ ھک ایجھے ویلھے میکوں ایں منصب تے ٻلہائے جݙاں اساں ری ریکارڈڈ قومی ترانہ لانچ کریندے پیوں ۔ انہاں آکھیے وزارت اطلاعات تے آئی ایس پی آر دیاں ٹیماں سودھے اساکوں مسلح افواج دے بینڈ ماسٹرز، گلوکاراں اتے موسیقاراں تے فخر اے جنہاں ایں قومی ترانے دی تیاری اچ اہم کردار ادا کیتے۔ وفاقی وزیر اطلاعات آکھیے جو پاکستان دی ڈائمنڈ جوبلی تقریبات پورے ملک اچ منائیاں ویندیاں پئن ، وزارت اطلاعات پارلیمنٹ، قومی اسمبلی سودھے سارے حکومتی ادارے ایں وچ آپݨا آپݨا حصہ پیندے پئن ، انہاں آکھیےجو ڈائمنڈ جوبلی دی ساری تقریبات پی ٹی وی تے لائیو ٹیلی کاسٹ کیتیاں ویندیاں پئن ۔
