اسلام آباد۔6جون(اے پی پی):صدر مملکت آصف علی زرداری گلگت بلتستان دی سماجی و اقتصادی ترقی تے توجہ ݙیوݨ دی لوڑھ تے زور ݙیندے ہوئیں آکھیے جو گلگت بلتستان دے عوام کوں دہلیز تے بنیادی سہولتاں ݙیوݨ سانڳے صحت، تعلیم اتے سڑکاں دے انفراسٹرکچر دی ترقی سانڳے اقدامات کیتے ویسن ۔ گلگت بلتستان اچ ٻہوں تے وسیع اقتصادی صلاحیت موجود اے ۔ ایوان صدر دے پریس ونگ موجب صدر مملکت آصف علی زرداری گلگت بلتستان کونسل دے ارکان نال ڳالھ مہاڑ کریندے پئے ہن جنہاں ایوان صدر اچ انہاں دے نال ملاقات کیتی ۔ صدر مملکت آصف علی زرداری آکھیے ، گلگت بلتستان چین دے سنگم تے واقع اے،گلگت بلتستان اچ سرمایہ کاری توں خطے اچ معاشی خوشحالی آسی ۔وفد صدر مملکت کوں گلگت-بلتستان دی ترقیاتی اتے مالی ضرورتاں بارے ݙسائے ۔اجلاس اچ وفاقی وزیر امور کشمیر و گلگت بلتستان انجینئر امیر مقام ، وزیر اعلیٰ گلگت بلتستان گلبر خان ، گلگت بلتستان کونسل دے ارکان تے اعلیٰ سرکاری افسر شریک ہن ۔ صدر مملکت گلگت اچ ہوائی اݙے کوں وسعت ݙیوݨ ، گلگت-بلتستان دی ترقی سانڳے نویں رستے ڳولݨ دی لوڑھ تے زور ݙتا ۔
