اسلام آباد۔18دسمبر(اے پی پی):ملک اچ عام انتخابات 2024ء کیتے امیدواراں کوں کاغذات نامزدگی (کل)منگل توں جاری کیتے ویسن جیڑھے جو ٻدھ توں جمع کرائے ونڄ سڳسن ۔قومی اسمبلی دے کاغذات نامزدگی دے نال سکیورٹی فیس 30 ہزار جݙاں جو صوبائی اسمبلی دے نال 20 ہزار روپے جمع کراوݨی ہوسی ۔ الیکشن کمیشن دی طرفوں جاری کیتے ڳئے شیڈول موجب آندے عام انتخابات کراوݨ سانڳے تیاریاں زور شور نال جاری ہن ۔ انتخابی عملے دی ٹریننگ دا اختتام (کل ) منگل کوں تھیسی جݙاں جو ایں ݙینھ ریٹرننگ افسراں دی طرفوں پبلک نوٹس جاری کیتا ویسی ۔ امیدواراں دی طرفوں کاغذات نامزدگی 20 توں 22 دسمبر تئیں جمع کرائے ونڄ سڳسن جنھاں دی ابتدائی فہرست 23 دسمبر کوں جاری کیتی ویسی ۔ ریٹرننگ افسراں دی طرفوں کاغذات نامزدگی دی جانچ پڑتال 24 توں 30 دسمبر تئیں ہوسی جݙاں جو کاغذات نامزدگی منظور یا مسترد کیتے ونڄݨ دے خلاف اپیلاں 3 جنوری 2024 کوں دائر کیتیاں ونڄ سڳسن جنھاں تے اپیلٹ ٹربیونل دی طرفوں فیصلے 10 جنوری تئیں کیتے ویسن ۔ امیدواراں دی نظرثانی شدہ فہرست 11 جنوری کوں جاری کیتی ویسی ۔ کاغذات نامزدگی 12 جنوری کوں واپس گھدے ونڄ سڳسن جݙاں جو ایں ݙینھ امیدواراں دی نظرثانی شدہ فہرست جاری کیتی ویسی ۔ امیدواراں کوں انتخابی نشان دی الاٹمنٹ 13 جنوری کوں کیتی ویسی جݙاں جو پولنگ 8 فروری 2024ء کوں تھیسی۔
