اسلام آباد۔22اپریل (اے پی پی) پاکستان اتے ایران تجارت تے مواصلاتی رابطے سودھے مختلف شعبیں اچ تعاون ودھاوݨ تے دہشت گردی مکاوݨ سانڳے مشترکہ کوششاں تے اتفاق کیتے۔اے اتفاق رائے سنوار کوں وزیراعظم ہاؤس اچ وزیراعظم محمد شہباز شریف اتے ایران دے صدر ڈاکٹر سید ابراہیم رئیسی وچال ملاقات اچ تھئے ۔ وزیراعظم ہاؤس آمد تے وزیراعظم شہباز شریف ایرانی صدر دا استقبال کیتا ۔ ݙوہیں رہنماواں ھک ݙوجھے سانڳے نیک خواہشات دا اظہار کیتے۔ وزیراعظم ملاقات اچ آکھیے عام انتخابات دے بعد تساں پہلے سربراہِ مملکت او جیڑھے پاکستان دا دورہ کریندے پیو۔ میں سودھے پوری پاکستانی قوم تساڈے ایں دورے دا خیر مقدم کریندی اے ۔ ایرانی صدر پرتپاک استقبال تے وزیراعظم دا شکریہ ادا کیتے۔ ݙوہیں رہنماواں ایران پاکستان فو طرفہ تعلقات ودھاوݨ دے مختلف شعبیں اچ تعاون ، تجارت اتے مواصلاتی رابطے ودھاوݨ دے حوالے نال ڳالھ مہاڑ کیتی۔ ݙوہیں رہنماواں دہشت گردی مکاوݨ سانڳے ݙوہیں ملکاں دی طرفوں مشترکہ کوششاں تے اتفاق کیتے۔
