اسلام آباد۔5جولائی (اے پی پی) نائب وزیراعظم اتے وزیر خارجہ تے سینیٹ اچ قائد ایوان اسحاق ڈار آکھیا جو نجکاری دا عمل مکمل شفاف ہوسی، سی سی او پی دے سربراہ دی حیثیت نال شفافیت یقینی ٻݨیساں۔ جمعے کوں سینیٹ اجلاس اچ ریاستی ملکیتی اداریاں بارے ترمیمی ایکٹ بل تے سینیٹرعلی ظفر دےنکتہ اعتراض دا جواب ݙیندیں ہوئیں اسحاق ڈار آکھیا جو نجکاری بارے سارے حکومتی اتحادیاں کوں وی اعتماد اچ ڳھدا ویسی۔ پاکستان سٹیل ملز دے خسارے اچ ارباں روپے قوم دے ضائع تھی ڳئن، اساں ٻیا نقصان نی برداشت کر سڳدے۔ انہاں آکھیا جو پی ٹی سی ایل مشرف دور اچ اتصالات کوں ویچیا ڳئیا۔ پی ٹی سی ایل دے ساݙھے ترائے سو اچوں ݙیݙھ سو اثاثے اڄاں وی اتصالات دے حوالے نی کیتے ڳئے۔ اساں انہاں کوں 150 توں 30 اثاثہ جات تے ڳھن آیوں۔ اتصالات انہاں اثاثیاں دی آپݨے طور نرخ لوائے، انہاں پراپرٹیز دی 263 ملین ڈالر نرخ لوایا ڳئے جیڑھا جو ٻہوں ڳھٹ اے۔
