اسلام آباد۔21مئی (اے پی پی):وفاقی کابینہ ایران دے صدر ڈاکٹر سید ابراہیم رئیسی ، ایرانی وزیرخارجہ حسین امیر عبداللہیان اتے انہاں دے رفقا دی ہیلی کاپٹر حادثے اچ شہادت تے تعزیتی قراردادمنظور کریندے ہوئیں پاک ایران تعلقات اتے خطے دے حوالے نال خدمات تے ڈاکٹر سید ابراہیم ریئسی کوں خراجِ عقیدت پیش کیتےجݙاں جو وزیر اعظم شہباز شریف آکھیے جو ابراہیم ریئسی جیّد عالم تے صاحب بصیرت رہنما ہن، پاکستان مخلص اتے بھراویں جہیا دوست ونڄا ݙتے۔ وفاقی کابینہ دا اجلاس وزیر اعظم محمد شہباز شریف دی صدارت اچ تھیا ۔اجلاس اچ ایرانی صدر، وزیر خارجہ اوتے انہاں دے رفقا سانڳے مغفرت دی دعا کیتی ڳئی ۔قرار داد اچ آکھیا ڳئے جو پاکستان دی حکومت اتے عوام کوں اسلامی جمہوریہ ایران دے صدر ڈاکٹر سید ابراہیم ریئسی اتے ایرانی وزیر خارجہ حسین امیر عبداللہیان اتے انہاں دے رفقا دی المناک حادثے اچ شہادت دی خبر نال ٻہوں وݙا ݙکھ تھئے ۔ اساں ݙکھے ویلھے ݙکھی خانداناں تے اسلامی جمہوریہ ایران دے عوام نال دلی تعزیت کریندوں ۔ ساݙیاں ساریاں ہمدردیاں شہداء دے اہلِ خانہ اتے ایرانی عوام نال ہن ۔ پوری پاکستانی قوم اوکھے ویلھے بھرا ملک ایران نال کھڑی اے ۔ ایں حوالے نال وفاقی کابینہ دے اجلاس توں خطاب کریندے ہوئیں وزیراعظم آکھیے ایرانی صدر ڈاکٹر سید ابراہیم ریئسی ھک جیّد عالم اتے صاحب بصیرت رہنما ہن ۔ پاکستان ڈاکٹر ابراہیم ریئسی جیہا مخلص اتے بھراویں وانڳوں دوست کوں ونڄا ݙتے ۔ وزیراعظم ڈاکٹر سید ابراہیم ریئسی کوں خراج عقیدت پیش کریندے ہوئیں آکھیے ڈاکٹر ابراہیم رئیسی دی اپݨی قوم دے نال نال پاکستان ایران تعلقات اتے علاقائی تعاون ودھاوݨ سانڳے خدمات کوں ہمیشہ یاد رکھیا ویسی ۔ انہاں آکھیے گزرل مہینے ڈاکٹر ابراہیم ریئسی دا دورہ پاکستان ساݙے ݙو پاسے تعلقات کوں مزید تکڑا تے مستحکم کرݨ دے حوالے نال ھک اہم سنگ میل ہئی ۔ ایرانی صدر دے دورہ پاکستان اچ پاکستانی عوام نال گزریے لمحات ہمیشہ یاد رکھیے ویسن ۔ کابینہ منظور کیتی ڳئی قرار داد اچ ایں عزم دا اعادہ کیتے جو مرحوم صدر ڈاکٹر سید ابراہیم ریئسی دے پاک۔ ایران تعلقات دی مضبوطی اتے ودھارے دے وژن کوں جاری رکھیا ویسی ۔ کابینہ دعا کیتی جو اللہ تعالیٰ ایرانی صدر ڈاکٹر سید ابراہیم ریئسی، ایرانی وزیر خارجہ اتے انہاں دے رفقاکوں جنت الفردوس اچ اعلیٰ مقام عطا کرے۔
.jpg)